Evo nas jopet ovod, svak u svojon čibi. Ka pravi grdelini, čekajuć cvrkut da mu cvrkuton omar uzvratimo.
Roba koju je Todorić skupja oprana je i šumprešana. Eno je u dvi kartonske škatule na tleju. Triba još poć u Hanfu vazest karton.
Da bi sve ispalo kako triba, tu je Zagrebačka banka, prez koje nima gotoveg posla. Njezina je za’nja.
Nima zajebancije, vaja na sve mislit !

Zato san danas da brokeru da mi kupi još ovega poduzeća.
Ajme meni, pa di ćete ga držat, to će Van puno vonjat?, reče mi on.
Bome u vrićicu i na gvozd o’ ponistre, lipo san mu reka ! Turaču naprid, pa kako nakraju izaje !

Ako ne dospijemo do štacije od dvi iljade kun jopet će bit dobro. Važno je da je sve na svon mistu, da od danas vrićica visi na katrigi i čeka, pa ča Bog da! Ako ništa, potrošili smo pinku vrimena i u’ja u svići.

Fala Todoriću, fala mu za fantažiju, za jubav i punu škatulu sitniša na mojemu mižernom računu, s probužanin pokrivon ča još uvik vonja friškinon i koprca se uz za’nje rešpire mog sićanja na muke Mlinarove ča jih više ni.